M

usidɓe tedduɓe, Fulɓe yontaaɓe e ɓe ngonaa Fulɓe nanooɓe ngal, onon fof on calminaama kadi teddungo. On nduwanaama moƴƴe Alla e kuuɓal tawa ena wondi e coftal e darnde ngam toownude ngal ɗoo ɗemngal haa ɓeydoo toowde! Waɗii hannde duuɓi ko eɗen ngaddana renndo Pulaariyaŋkooɓe ngal coftal nganndi ngam ɓeydude ceeɓeendi hakkillaaji, yanti heen waɗdude tuktukordu e kelme ɓurɗe luggiɗde e wirnaade. Ɗum fof ko e tiiɗtinde ganndal ɗemngal men et wallude janngooɓe e annduɓe yiytondirde e konngi ɗi meeɗaa walla mbayri nande!

usidɓe Fulɓe, ndado-ɗee! Tigilde men hesere ndee arii, yettiima ɗoo. Ngol-ɗoo laawol kam, soklaani ko miɗo ɓetana-on toosgol mayre, oɗon nganndi mi yiɗaa ko alaa kaata, ko ŋakki ñomoko, ɗawaa cekkiri. Fof ena e mayre, so a wiyi ŋato-ŋato Ngaandi tan, ko ɗoo tawetee e mayre! Nganndi noon so ŋatii, aannii sabu ŋaañotaako! Hoto hay gooto sikku kadi ena waawi heɓde sige ko ena nofloroo haa yettoo ngaanndi, gasataa. Etinooɓe poɗɗe pasooje ɗee nana lofii e maayo nimsa e haame! Min wiyino-on mi jeelaani, on njaɓaani: no wayi?

aala maayii! E weetndoogo hee, en keɓii wortaade tigilde nde en meeɗaa waɗde hono mum. Mi lolliniio postol e Facebook ngam woytaade horaade-mi gaynude nde, Alla e mayre toosde! Mi ɓil ɗo toowi sabu hatojinde e jiiɓde hakkillaaji mon e muusnude koye. Mi tuufiima hoore am ndeke mi tinaani sabu waɗii balɗe ko korii-mi wortaande. Oɗon nganndi oon bannge mi alaa njurum hay seeɗa! Tee min tan teyi! Ko mbaaw-ɗon heen? Miɗo anndi saaysayeeɓe wayɓe hono Hammadi Jah (jaagaraf maɓɓe, mmj) nana leewoo tan gila habraa tigilde ndee nana ara! Leewaali noon e wanngaade, yo a taw aɗa hoolii kuɗol, ndo, doombru maa. Bajo ko neɗɗo waawi fof ndee kam jeelaani. Ko goonga nde juutii tadfe, kadi nde toosii konngi, kono dakamme oo ko ɗoon tigi woni.

itaande 2017 dariima, yoo darano en jam, kisal e ɓamtaare! Onon kala no ndiidorino-ɗon, oɗon nduwanee e mayre moƴƴere huuɓtidinnde, kañum e duwawu Alla nde haajuuji kumtotoo, golle newoo, jawkal ɓeydoo. Kono hoto puuntee koye mon, addi-mi ɗoo ko ñiklude ngannde mo woni e mon kala, kañum e muusnude koye e ndee tigilde nde tooke mum meeɗaa yiyeede tawo e lowre men! Ko miin teyi kadi, mo welaaka fof yoo ngemmbo haɓa e mayre! Njaafo-ɗon mi alaa poɗɗe pasooje noon...