usidɓe Fulɓe, en ɓooyii tijjaade oo kabaaru pattamlamo! Hannde eɗen njaɓɓoo gootal e kuutorɗe ɓurɗe hatojineede e gannde kese wonande kaɓirɗi cinnde. Ngaal kuutorgal ko Tappirde Pulaar wonande kaɓirɗi afaaɗi yuɓɓo Android. Sikke alaa, Afrik ko cinndel laamii hannde haa janngo. Fuɗɗaama faameede e nokkuuji toowɗi karallaagal wonde cinnde njogori lomtaade ordinateeruuji e nokkuji men. Fulɓe ena kebii naatnde ɗii sahaaji kesi. Tappirde men naani dingiral.

Tappude Pulaar e Enternet wontii hannde "parcacca" so mi luɓiima konngol yonta ngol. Wonnoo ngoƴa gila ndee ko waawde tappude e cinnde alkule men ɗee. Kaan ngoƴa fuɗɗiima joopeede gila nde PULAAGU.COM weddii eeraango feewde e renndo ngoo ngam roɓindaade humpito baɗte juɓɓe dogooje e cinnde yilliyaŋkooɓe lowre ndee. Oon sonndaas waɗanoo ko e lewru Colte 2012. Njaltudi sonndaas oo hollirii wonde nokitannde Fulɓe huutortooɓe cinnde njogii ko juɓɓe ɗiɗi teeŋtuɗe: Android: 36% e iOS (Apple): 20%.

Tawde ɓurɓe heewde ɓee njogii ko Android, ena haani puɗɗoro-ɗen tappirde Android sabu naamnotooɓe-nde ena keewi sanne. Koino wonaa ɗuum tan waɗi-en wuuranaade Android. Enen kala eɗen nganndi Adroid e Apple ceerti ko e baydi jamirol mum'en. Woni jamirol ko no topirde ndee saakirtee e renndo, so yeeyete walla ko Alla-ɓolo. Walla so koko udditanii mo woni kala, walla koko uddii. Android ko "Daɗi Udditiiɗi" (Open Source). Firti ko dokkol yuɓɓo ngoo koko udditanii topotooɓe e huutortooɓe. Aɗa waawi naatde heen, mbaylaa dookol ngol, keertinaa ngol haa jaaɓde e paandaale maa. Kono yuɓɓo iOS ngo Apple ko jeyateewo. Ko Apple jeyi etee a waawaa naade heen ngam waylude walla heertinde. SO en njiɗii waɗde tappirde Apple, dame ɗee koko uddii etee weeɓaani naaten toon so wonaa tawa Apple ena yiyi heen ngartam to bannge koppore. Ko heddii koo ɓe ngonnsaaka!

Arii ndeke haa yettii ɗoo, tappirde Pulaar Adroid bayyinaama caggal ko ɓuri hitaande amin ngolloo heen. Ngati golle ɗee ngasii nih gila e hitaande maaynde ndee kono min ngonnoo tan ko e ƴeewndo haa min njenandee alaa cugge e caɗe nde min ngaaynoo e renndo ngoo. Hannde min cikki haŋkadi ko yontii ndee Fulɓe jogiiɓe Android keɓata kuutorgal ngal.

Tappirde Android ndee tugnii ko e golle Sosietee gooto ena wiyee AnySoftKeybord. AnySoftKeybord woni golle mum ko tafde jaaɓnirgal Adroid jaɓowal tappirɗe e ɗemɗe keewɗe. Min njeewtidi e maɓɓe e darorɗe 2012 ngam naatnude tappirde Pulaar huutoraade dinndeere maɓɓe ndee. Kisa ɓe naamnii yo min ngollo e lelngo tappirde Pulaar ndee. So min kaljitii, min njokkondira e maɓɓe, ɓe ƴeewa no naatniraa e ɗemɗe AnySoftKeybord.

Minen ne min mbayi hono yumɓe hoccuɓe gite (neen'am wiyatnoo!). Wonaani balɗe neldu-mi lelngo ngoo. Ko ndeen min puɗɗii wontondirde miijooji no golle ɗee njogori wayoyde. Ɓurii hitaande ko amin neldondira meeluuji ñalnde kala. Haa hannde hannde meeluuji ena ngara ena njaha. Miɗo yetta heen biyeteeɗo Menny Danan, hooreejo AnySoftKeybord, dariiɗo haa mbaaw-ɗen gollodaade e maɓɓe. Kadi o yiyti heen ko woni Pulaar, ko woni Fulɓe. Ɗuum weli-mo no feewi.

Jooni noon payen e golle! Hol no tappirde ndee heɓortoo? Hol no nde aafortoo e cinnde e taable Android? Ko adii kala maa njogo-ɗon yuɓɓo Android. Alaa hujja naamnaade-min so ende yaha e juɓɓe goɗɗe: jaabawol mum ko ALAA!

Ngam aafde tappirde Android, geɗe tati ena mbaɗɗii! (Ƴeew nate gonɗe les ɗee)

• 1. Yah to https://play.google.com/store/apps/details?id=com.menny.android.anysoftkeyboard , ngaafaa jaaɓngal "AnySoftKeybord"
• 2. Yah to https://play.google.com/store/apps/details?id=com.anysoftkeyboard.languagepack.fulah ngam aafde tappirde Pulaar ndee.
• 3. Yah to Teelte kaɓirgol maa ("Paramètres"(Fr)/Settings(En)), ƴeewaa "Langue et Saisie"(Fr)/"Language and Input"(En). So a yahii toon maa yiy toon "AnySoftKeybord", kisa labo-ɗaa ɗum. Kisa ɓennu payaa to teelte keeraniiɗe tappirde "AnySoftKeybord" ndee. Ɗoon maa yiy Pulaar, kisa labo-ɗaa. So njogiɗaa ko Adroid Farayseere, labo AZERTY, so Adroid Engeleere, labo QWERTY. Aɗa waawi labaade kañje ɗiɗi so aɗa welaa.

Caggall ɗuum yah to tappetee binndi ngam ƴeewndaade so tappirde ndee affiima no haanirta nih.
Banndiraaɓe, kala e mon aafɗo tappirde Pulaar ndee, yoo rutto to lowre mayre to Google Play ngam hokkude miijo mum e yeende koode: koode 5 ✮✮✮✮✮ woni yuɓɓii no feewi. Ndokkee-en koode joyi sabu golle ɗee ena juɓɓi sanne! On njaaraama.

Haŋkadi cettee kuɗi mon, mbinndon Pulaar e cinnde haa wela, haa welƴa, ko onon teyi!

• Dobo ngam mawninde natal Dobo ngam mawninde natal
• Dobo ngam mawninde natal Dobo ngam mawninde natal
• Dobo ngam mawninde natal Dobo ngam mawninde natal
• Dobo ngam mawninde natal Dobo ngam mawninde natal
• 
•