usidɓe tedduɓe enen fof waastaa tawa eɗen ciftora winndannde fattamlamiire yaltunoonde e jaaynde anndaande e aduna oo fof ena wiyee "The Economis t". Ndeen winndannde haalatnoo go golle mbaɗaten e firooji gannde kese e Pulaar haa teeŋti e ngaandiwal (informatique). Ko e ɗanngal Bamako e hitaande 2014 njeewtinoo-mi e jaayndiyaŋke Angalteernaajo ena wiyee Colin Baker. En njahno toon hawroyde e kawral Ganndiwe Jamminaaɗe (Sciences Appliquées) ngal Fedde MSAS/Maliwatch yuɓɓinta duuɓi ɗiɗi kala.

Ndeen winndannde ena haaletenoo heen peeje e miijooji ngam sosde kelmeendi toɗɗiindi yuɓɓo cinnde Firefox OS. Ɗeen peeje ena jeyaa heen huuyoraade kelme ɗe Fulɓe njoginoo tawa ngoni ko e majjude sabu gollal walla piije ɗe ɗe toɗɗii nattii woodde walla huuyoreede. Ko waɗnoo caggal wɗto e njiylaw, kuutori-ɗen ko heɓatat nagge sahaaji, yana tan, jaɗɗa tawa maayaani. Wiyetee ko nagge ngee "hookii". So en ngartii e kelme gannde kese ɗee, ordinateer kadi eɗem heɓa ɗum: o "hooka" tan o saloo yahde haa wona. Ndobo-ɗaa e doombel walla piyaa e Tappirde haa tampaa, o salaa. Heewi ko maa ceŋtaa ɗum e kuuraa walla ɓoɗɗaa butoŋ ngam hurmitinde masiŋ oo.

Ndeen hookre woni ko e majjude e nokkuuji keewɗi ɗo nayi caɗti. Artirde helmere ndee e mbaydi kesiri ena addana yimɓe anndunooɓe siftorde; walla ɓe nganndaano anndude. Ɗum ko won e peeje ngam reende ɗemngal Pulaar tawa kadi ena haɗa en jiggoyaade ɗo njogi-ɗen konngol.

Hannde noon, ko haawnii waɗii. Oɗon nganndi ndeen windande sariima no feewi e geese ɗee sabu "The Economist " ko jaayde mawnde, lollunde nde hohooɓe e annduɓe winndere ndee njanngata sahaa kala. Yanti heen, ndeen tonngoode jaaynde ndee, wonnoo e ŋaro mum ko Barak Obamaa, Nikolaa Sarkosii en. Wadde haala kelmeendi Pulaar ndii saakiima no feewi. Won Italinaaɓe mbinndi-mi hannde. Ɓe mbiyi ko e ndeen winndannde ɓe tugnii ngam sosde fedde ena wiyee "Hookii". Kadi fedde ndee ena jogii konngol cifotoongol woni "nagge ngee hookii kono nge maayaani"! Fedde ndee ena jogii lowre Enternet ena wiyee "hookii.it ". Ɓe naamnii-mi noon hol no helmere ndee wowlirtee e Pulaar! Nde keɓ-mi ɓataake oo, mi jal haa tampu-mi sabu mi ɗaminanooki konngol ngol ena hatojinee to tuubakooɓe haa ko eɓe mbiɗta ngol. Mi daaranii ɓe ko woni hookre, kadi ko anndanta nayi hookde. Ɓe mbiyi ko ɗum tigi waɗi ɓe pelliti huutoraade "hookii", tugnaade e ndeen winndannde yaltunoonde e "The Economist".

Njaabii-mi wonde alaa ko ɓuri ɗum welde e jalnaade kadi sabu kamɓe fof e woɗɗude pinal Fulɓe, so ɓe kappii-ma helmere ndee, ɗum waawata tan ko welde Fulɓe. Yanti heen ɗum ko yeru jooɗɗo naattondiral pine sabu be mbiyi ñemmbat-maa ko jeeɓoowo ma.

Lowre ndee ko lowre mawnde, yilleteende sanne. Ko nde lowre kabaruuji e jeewte ɗo yimɓe naatnata jowe baɗte kala ko joli e winndere ndee.

 No hhokii wowlirtee?