Ko adii fof en ñaagiima renndo ngoo fof diwaawu nde Alla hokkata en fuɗɗoraade Bismillaahi 'Rahmaani 'Rahiim, ngayniren Alhamdu Lillaahi Rabbil Aalamiin.Ko e yontere mawnde paaɗen tuggude e hannde Naasaande 19 lewru Seeɗto ndu ngon-ɗen duu haa ñalnde Njeslaare 25 lewru nduu. 

Waasataa enen kala eɗen nganndi ko e ndee yontere Ziyaara mawɗo mo renndo juulɓe fof waɗanta oo kalifa tedduɗo waɗetee. Hikka ko.ñalnde 21 lewru nduu jaggaa ngam kawral almuɓɓe, yiɗɓe e teddinɓe ceerno Maajakatee Kah toon to wuro men Aañam Siwol. Waɗii hannde duuɓi limlimtinɗi ko Ziyaara oo waɗetee haa hannde ena yahra e 25 ɓo! Maa min ngaddan renndo ngoo kala humpito baɗte njuɓɓudi ñalɗi ɗii, e no golle ɗee lelniraa tuggude e sabaka ñalnde Mawnde 20 ndee haa nde kawral ngal wortetee ñalnde Hoore-Biir 21 ndee.

Kono enen fof e yiɗde anndude njuɓɓudi ndii no jogori yahrude, ɓurɗen hannde hatojinde ko siftineede holi oo kalifa gonɗo sabaabu renndo men ena ummoo e nokkuuji kala ngam tawtoyde mo toon to Siwol hitaande kala. Ma en njubbu e ngurndam makko ngam anndinde banndiraaɓe fof ɗo o heedi en to bannde mawninde Alla a saakde ganndal deftere Alla ndee.

Eɗen nganndi ko Ceerno Muhammadu Saydu Bah Rta mo Madiina Gunaas woni fofof makko. Etee kala ko o waɗi to bannge diine oo e dewal Alla, gila e ɓaarnude ko ena abboo e teemedde joy almuudo haa e hokkude laawol ngol ujunaaje neɗɗo, ko e yamiroore ceerno Muhammadu Saydu Bah Rta. Ko noon kadi o heɓiri yamiroore to ceeeno Ahmadu Boyinaaji, ko noon kadi e ceerno Muhammadul Mansuur, e woɗɓe ɓe en mbaawaa limtude. Ɓee hilifaaɓe tedduɓe fof omo renbdini moƴƴe e teddule mum'en e ɓernde makko, kaŋko ceerno Maajakatee Kah. Ko o neɗɗo Alla, ko o duuɗiiɗo, ko o suufiyaŋke denndinɗo jokkere enɗam e kaaraysiraagal waɗi ɗum fiɓnde hakkunde mum e juulɓe.

Ceerno Maajakatee Kah ko e Fuuta tan jooɗii. Ko ɗoon e Siwol o woni gila o arti e wuro hee e hitaande 1985. Ko tuma nde o jooɗii Maatam omo huufi almuɓɓe makko omo janngina, Alla waɗi hakkunde makko e ceerno Saamasa. Oon sahaa tawi ko suka. Ko ɗum waɗi ena teskaa e Ziyaara hitaande fof, naatde ceerno Saamasa e jooɗnde ndee ko huunde mawnde. Kadi nde o ɓami konngol fof, faamete hakkunde makko e ceerno Maajakatee ko Alla tiiɗni ɗum.

Musidɓe tedduɓe, on njiyi no min mbayi reerɗude e jokkude haalande on golle e balle oo kalifa tedduɗo. Waɗi noon ko anndude winndannde wootere famɗanii ɗum. Ko ɗum waɗi amin ndokka on aadi-bil-aadi tuggude hannde ngam addande on seeɗa e ko min nganndi e keewɗe makko, moƴƴe makko e yiɗde makko Alla. Enen ngonndi so Alla jaɓii haa yontere ndee wortee. Amin ñaagii nde gooto e mon kala addata heen ballal mum, foti ko yowre, seedantaagal walla duwaawu, alaa ko min njawi.