M

usidɓe tedduɓe Koorka dariima. E nduu lewru, eɗen nganniyii yaltinde ɗoo binndanɗe ɗe Ceerno Jalaalu Diin Bah heewno winndande renndo ngoo e koorka kala. Binndanɗe ɗee ena mbaɗi jaŋde e faamamuuya, kadi ko ɗe ɓulnorɗe ngam heɓde ɓure dewal men Alla. En mbaynaaki mo kaŋko ceerno Jalaalu sabu eɗen nganndi ko e Pulaar o waɗata haajuuji makko e hammuuji makko kala, teeŋti e diine Lislaam oo. Defte keewɗe ɗe o winndi e Pulaar ena ndoga hannde e renndo men. Toon to Madiina Gunaas, heɓde en baaɗo hono makko ku ɓural ngal hay gooto anndaa no foti mawnude! Yoo Alla juutnu balɗe makko, moƴƴina battane! Aamiin

Mi anndaa so en leelaani jaɓɓaade oo koɗo tedduɗo, moƴƴo, jaakoraaɗo aduna e laakara.. Koorka arii, ina ɗaminaa hannde kekiiɗe maa lewru nduu daro, puɗɗoɗen janngo, so Alla jaɓii.
Koorka arii ina wondi e cellal ɓalli, cellal hakkillaaji, cellal ruuhuuji... Ɗoo e balɗe seeɗa, so Alla jaɓii, tawata ko ɓalli keewnooɗi teddude, keewɗi heen nattii teddude, rafiiji keewɗi tawata ko cuuɗiima, ɗoo haandu maaya, ɗeen caɗeele cuuɗiima ngartataa haa ndu yaha kadi...
Ɗuum ji'daa e yaafuya Alla gonɗo e mayru, e jinngol Alla mawngol ngol Alla waɗanta juulɓe e mayru; Alla tonngat seyɗaneeji, uddita dame aljanna, udda dame jayngol, weeɓtina jaŋde alqurana, hebbina rewooɓe ɗum e dewe mum e nder juulɓe.
Ko ɗuum waɗi eɗen njaɓɓii ndu e ɓerɗe uddutiiɗe, beltiiɗe beytiiɗe ɗaminiiɗe moƴƴere Alla, jaakoriiɗe ɓural makko, o toowii. Eɗen njaɓɓoroo ndu:
— yaafondirde sabu Alla “OƊON NJARLOO, OƊON NJAAFOO”
— wallondirde fotde ko Alla newni fof; hay so ko humtinde juulɗo banndum, haa e sakkaade heen,
— jokkude heen enɗam..
— tiiɗnaade heen e Quraana e juulde e ɗnnabi sallallaahu alayhi wasallama
— tiiɗnaade heen e naafilaaji jamma
— wakkilaade, siirtuu, e ko lewru nduu naamndii: hoorde ñaamnde e yarde, hoorde ngena, hoorde e ñohde e yennude e dow belaaɗe tan, hoorde e bonanndeeji kala, hoorde e haalaluuji pucupacaaji ɗi ngalanaa ngonanaa.. hoorde e kala ko welataa Alla haa heƴa e weleede Alla wellitiinde bde tikkere alaa caggal mum.
Yo Alla waɗan en noon e moƴƴere mum.

Evaluation utilisateurs

   (0 vote)