uulɓe aduna oo kala hannde ngoni ko e dakmitaade e poolgu mum'en e cuusal mum'en e lewru koorka jiimaandu hannde ena jogori maayde! Ngati fuɗɗinooɓe ñalnde Aaɓnde 6 Duujal ɓee fof, ndañii hannde 28 ñalngu. Wadde janngo, Aaɓnde 29 Koorka foti tijjeede lewru ena faañana juulɓe ngam juulee ñalnde Mawbaare 30 (4 Korse 2019). En mbindiino winndannde e darorɗe lewru nduu, kollu-ɗen e mayre wonde luure keewɗe jolooje hakkunde dawrooɓe e ɓe ndawraani addi ɗum'en ko waasde tugnaade e ganndiwal.

Hikka ne, juulde ndee won no fotaani yahrude: woni ɓee njuula hannde, ɓeya njuula janngo! Won nih daɗondirooɓe balɗe tati, haalande ladde! Kono ena laaɓi Juulde koorka 2019 waawata wonde tan ko ñalnde Njeslaare, 5 Korse! Hol ko woni daliilu mum?

Goo, lewru nduu waawaa yiyeede janngo 3 Korse, hawra e 29 Korka. Haɗata ndu yiyeede tan ko ndu daraaki tawo. En pamminiino e winndannde ɓennunde ndee wonde ko e Daawe Lewruyaŋkooje tugnaa ngam limde balɗe lewru. Ɗeen daawe jeetati ngoni: lewru dawndu, eelde lewoore, nayaɓere adannde, mbuuɗu lewoongu, lewru huuɓndu, mbuuɗu niwoongu, nayaɓere wattan e eelde niwoore. Lewru do timminii ɗeen daawe, lewru dawa kadi.Ena foti faameede kadi lewru nduu ko bannge mum gooto tan yiyetee, woni bannge kuccitɗo e leydi oo. Oɗon mbaawi tarde winndannde men ɓennunde ndee ngam ɓeydude faamde oon fannu, kañum e daawe ɗee kala.

 

 

 

Lewru nduu, waɗata en yiyde-ndu ko naange fiyata e mayru caafe mum, kono ndu wonaa lewñanooru hoore mayru. Kono kadi caafe naange ɗee njettotoo tan ko yeeso huccitngo e leydi ngoo. So ɗuum ɓenii, so caafe naange kuuɓnii bannge keedɗo e leydi oo fof haa njiyen ena murliɗi, ndee woni daawal lewru huuɓndu. Ɗuum woni tuma lewlewal "sappo e tati", ellee ñalawma.

Lewruu ndu ngon-ɗen nduu, tugnaade e daawe, dawi ko hannde 28 Koorka. Ɗuum firti ko hay caafal naange gootal waawaa yettaade-ndu so wonaa ɓaawo janngo. Ngam niyren lewru nduu gite ɓole, maa caafe naange lewñina ko famɗi fof hedde 4% mahru. Janngo, lewru nduu heɓaataa hay caafal gootal, wadde ko 0% e layru yiyetee.

Ko ñalnde Mawbaare 4 Korse lewru waawata yiyeede. Kadi tawde ñalnde heen woni 30 Koorka, janngo mum alaa e sago juulee sabu balɗe 30 woni happo rowrowngo ko foti hooreede. Ɗoo e Farayse, ko ñalnde Aaɓnde3 Korse goompu toppitiingu jiygol lewtu jooɗotoo e Pari. Goomu nguu ena heewnoo tugnaade e ganndiwe kammuyaŋkooje ngam hiisaade nde hooretee. Ena heewi ko Farayse juuldi e ko ɓuri heewde e leyɗeele aduna ɗee. Ena saɗi ko ɓe cerindii. En sikkaa kamɓe ne, ɓe noosata ko Njaslaare 5 Koorka yoo juule.

Juulee mo wuuri! Yoo Alla hokku-en taweede ooɗoo sahaa mo wuuri tawa eɗen ɓeydii, eɗen ɓaydoraa!

Kuɗol Ibraahiima Malal Saar

 

.::| GIƊO PULAAR - WALLU PULAAGU/ DONATE TO PULAAGU / AIDEZ NOUS! ||::..

Aidez-nous à mieux défendre le Pulaar en faisant un don...Mballee-min e koppore ngam ƴellitde Pulaar...

ON NJAARAAMA FULƁE...

* * * * *Reentino e tummbitagol binndanɗe jaltooje e lowre Pulaagu.com * * * * *

Jeyi ndee windande ko Pulaagu.com. Nokkude nde walla eggin'de nde e lowre wonnde caggal yamiroore winndaande Pulaagu.com ena haɗaa. Kala cokluɗo ɓamtude binndanɗe amen e jaaynde, lowre walla rajo ena foti jokkondirde e Pulaagu.com ɗaɓɓude yamiroore. Kala ɗo winndannde Pulaagu.com ɓamtaa, ena waɗɗii joom mum siifde innde e ñiiɓirde lowre ndee kañum e innde binnduɗo oo. Waasde ɗooftaade ɗee-ɗoo kuule ko tooñaŋngee e waasde teddinde gollantooɓe pulaar. Oɗon toraa faamamuuya.