usidɓe tedduɓe, on calminaama haa ɗo saɗi duƴƴi e fownde! Weltaare ɓurtunde ngondu-ɗen hannde sabu huccitude e mooɗon ɗoo e lowre men nde ngoow-ɗen, nganndu-ɗen. Njiɗu-mi innude ko Lowre Pulaagu, eggundu hannde to ñiiɓirde mum hesere http://www.lowre-pulaagu.com. So on teskiima, lowre men dartinooma ko juuti hakkunde 2020 e jooni. Kadi ñiiɓirde ndeya, pulaagu.(com) añɓe e bonnooɓe coodi nde, ɓe kuccini e loowdi caaysayaagal ngam bonnande en, bonnana Fulɓe winndere fof!

Ndeen ñiiɓirde, ko enen njeynoo. Kono caggal nde ndartin-ɗen lowre nder, ngoppu-ɗen nde haa kebo-ɗen artirde lowre nde e ɓoggol. Ndeke, won ndaardannooɗo e yitre, ena rewindoo ko mbaɗaten. Joli ɓeen? Miin deh won ɓe tuummi hay so tuumo ɓolo yahataa jamaa! Musidɓe tedduɓe Fulɓe ena keewi añɓe no feewi, kono hono ɗee geɗe jaasɗe ko Pullo tan waawi waɗude ɗum. Waɗi-mi wiyde noon, ko ala e leƴƴi goɗɗi ɗii dewindiiɗe ko mbaɗaten haa tina lowre ndee dartiima, kadi jarana ɗum soodde innde domen pulaagu(toɓɓere)com, huccina ɗum e geɗe tufnude ngam bonnande Fulɓe. Go'o, sinno ko Fulɓe toɓɓaa, ndeen joom mum'en codataa kadi innde blog me binndaanɗo e farayseere oo. Kadi inɗe lowe Fulɓe nattuɗe woodude ena e Enternet haa keewi, hay gooto soodtaani ɗe. Wadde, bonannde ndee ko e am huccinaa, kono mettaani mi so wonaa ko golle Fulɓe mbonnaa sabu miin ko leñol men ngol fof ngollantoo mi. Wallaahi mi woondi e Joomiraaɗo Toowɗo oo, so won cikkuɗo ena waawi falaade mi golle ndaranii mi ɗee, oon dobiima feɗeen ñamokindu e hitere mum. Alaa ko waawi dartinde darnde meeɗen so wonaa Alla heɓta woŋki ko e luɓi-mi kii. Goɗɗo waawaa!

Kadi so on paamii, ɓurnoo wonde sabaabu dartingol lowre ndee ko hoɗnunooɓe en ɓee mbaɗtii yoɓnaade ko diwi sariya. Waɗi noon ko yamre PHP dognannoonde lowre ndee ko hiiɗtunde haa wooroo. Nde nattii huutoreede gila 2009. Kono ko kayre tan waawi dognude lowre ndee. So a suɓiima jame keɗe ɗee, lowre ndee majjat. Ko waɗi, so aɗa yiɗi huutoraade jame ɓooyɗe ɗee, maa njoɓaa seeɗa. En njaɓii yoɓde kono seeɗa fuɗɗii heewde, ɓurtude, haa yottii ɗo haaɗi lamɗam. Ko ndee pellit-ɗen dartinde haa feere woɗnde heɓee.

Ko e lewru Mbooy 2020 kaɓ-ɗen e ɓeen yoɓnotooɓe ko fakiti koo, kaɓɓu-ɗen piille men haa ɓiici, cuwti-ɗen! Kono, hade men suwtaade, en ndanndiino piile ɗee fof kam e diiñorɗe keɓe ɗee fof. Gila ndeen, lowre ndee woni ko e masiŋaaji am. Miɗo golloo heen kono alaa e ɓoggi saka goɗɗo yiya nde. Kadi eɗen njokki e yiylaade koɗnoowo jogiiɗo jame PHP ɗe katojin-ɗen ɗee, tawa pawataama nguru taktakri lewru kala! Ko e lewru Silto hee keɓ-ɗen ko en ɗaminanooki. Ɓeen keɓaama kadi geɗe mum'en caɗtaani haa wooroo!

Alla e moƴƴere mum newnanii en yollude toon keɓe lowre ndee, kisa cooɗu-ɗen innde domen "lowre-pulaagu.com". En njiɗaano waylude innde domen ndee kono añɓe keɓii ndeya, mbaɗi heen ko kaal-mi naane koo. So a dobiima, kawraa e salteyaagal e ɓalli ɓoli...

Jooni en cippirii e lowre ndee haa dartiima. Alaa ko waylii e mayre hay baɗte! Eɗen ngandi ko nde hiiɗtunde haŋkadi. Karalliwe ngal golliraa ɗee fof ngoni ko e nattude huutoreede. Nde waɗii sahaa mayre haŋkadi.Ko ɗuum waɗi eɗen eɓɓa geɗe kese oo sahaa. Tawa ko geɗe jahduɗe e ko dogata hannde koo, geɗe ɓurɗe hewɗude. Kono ndee lowre, loowdi mum fof majjataa. Eɗen ɗaminii feere no fof egginiraa e nokku ɓurɗo yahdude e karalliwe hande ɗee

 

Kuɗol Ibraahiima Malal Saar

 

 

 

.::| GIƊO PULAAR - WALLU PULAAGU/ DONATE TO PULAAGU / AIDEZ NOUS! ||::..

Aidez-nous à mieux défendre le Pulaar en faisant un don...Mballee-min e koppore ngam ƴellitde Pulaar...

ON NJAARAAMA FULƁE...

* * * * *Reentino e tummbitagol binndanɗe jaltooje e lowre Pulaagu.com * * * * *

Jeyi ndee windande ko Pulaagu.com. Nokkude nde walla eggin'de nde e lowre wonnde caggal yamiroore winndaande Pulaagu.com ena haɗaa. Kala cokluɗo ɓamtude binndanɗe amen e jaaynde, lowre walla rajo ena foti jokkondirde e Pulaagu.com ɗaɓɓude yamiroore. Kala ɗo winndannde Pulaagu.com ɓamtaa, ena waɗɗii joom mum siifde innde e ñiiɓirde lowre ndee kañum e innde binnduɗo oo. Waasde ɗooftaade ɗee-ɗoo kuule ko tooñaŋngee e waasde teddinde gollantooɓe pulaar. Oɗon toraa faamamuuya.